الكرتون واللي منه 💛❤️

ليه الكرتون خصوصا الحديث افضل الانجازات الي عملتها البشريه ...
طبعا لشخص زيي كان متابع كرتون من صغره علي سبيستون و ام بي سي 3
الكرتون بيمثلي ثقافه مستقله بذاتها عشت عليها جزء كبير من حياتي لكن في الوقت الحالي ظهر نوع جديد من الكترون نسبيا وهو الي بيتعرض حاليا علي كرتون نتورك بالعربيه او كرتون نتورك لو عندك كابل بقي و غني ...

ليه الكرتون الي بيتعرض علي كرتون نتورك من اعظم انجازات البشريه .. انا هفهمك ...

وعي الطفل و ادراكه و عقله الباطيني بيتكونوا في مراحل حياته المبكره بالتالي لما الطفل في العالم العربي يتربي في بيئه كلها تعصب ومفاهيم غلط من مصدر واحد و عروض تليفيزيونيه هابطه بيشوفها مع اهله او لوحده مع انعدام الرقابه بيشكلنا في الاخر شاب مهلهل الفكر سطحي التفكير اقصي همه في حياته ارضاء شهواته كأي حيوان عايش في غابه ... استني وهي مجتمعاتنا العربيه مش غابه فعلا ؟؟

عالعكس بقي في المجتمعات الغربيه مهما كان مدي انفتاحها و مدي تطرفها في مفهوم الحريه الا انها مركزه جزء كبير من اهتمامها في تكوين شخصية الاطفال ....

و اول طريقه للتحكم في تكوين شخصيتهم هي الكرتون ولحسن الحظ ان ده نفس الكرتون الي بتدبلجه كرتون نتورك و تقدمه للجمهور العربي بس للاسف بتبقي تحت رحمة الدبلجه الي ممكن تبوظ كل حاجه او الرقابه من شركه عربيه كل همها الفلوس مش وعي الاطفال ...

انا عارف ان في كتير منكم مش هيبلع كلامي .... كرتون ايه ياعم الي بتتكلم فيه ...
وقت المغامره و جامبول و العم جدو و كلارنس انت بتتكلم ازاي ؟ عايزين تصدقوني ؟ ...

انا هخليكم تصدقوني ...

علي كرتون نتورك بالعربيه من فتره اتعرض كرتون اسمه خلف حائط الحديقه ... كرتون مكون من عشر حلقات بيتكلم عن طفلين ضاعوا في غابه و بيهربوا من وحش وبيقابلوا شخصيات في رحلتهم بتساعدهم ... الاطفال هتشوف الكرتون و تستمتع بالفكره السطحيه بتاعته عادي لكن الفكره الضمنيه هتثبت في عقلهم الباطني و الفكره الباطنيه هي ان دي رحلة الاطفال في عالم ما بين الموت و الحياه او الليمبو الفكره الباطنيه الي هتثبت عندهم هي ان الكرتون مقتبس من عمل ادبي عظيم اسمه الكوميديا الالهيه لدانتي خصوصا رحلة الجحيم ...

الكبار الي هيشوفوا العرض بس هما الي هتوصلهم الفكره و هيوصلهم ان الكرتون مقتبس من عمل ادبي و ملحمه شعريه اما الاطفال فكفايه ان الفكره تثبت في عقلهم الباطني علشان شخصيتهم تتكون و وعيهم يتكون بشكل منفتح بحيث انه لما يقرا في حياته مثلا كتاب الكوميديا الالهيه بالصدفه البحته هتكون فكرة العمل اتزرعت جواه من صغره هيكون عنده وعي و نطاق فهم كافي لاستيعاب العمل ...

وده اسلوب معظم صناع الكرتون الامريكي حاليا ..

مثلا كرتون زي جامبول في واحده من حلقاته ناقشوا في مفهوم العامل في الفلسفه و ازاي لو العمال قرروا يسيبوا العمل العالم هيوصل لنهايته بل كمان زرعوا في الاطفال فكرة احترام العاملين دي الحلقه لما لاري قرر يسيب الشغل ...

بل الادهي انه بيناقش مشاكل اجتماعيه كتير بياعني منها المجتمع الامريكي ي سيطرة رأس المال علي الدوله و ازمة وول ستريت بل في حلقه سخروا فيها من مفهوم الشركات الاستغلاليه بقناع الجمعيات الخيريه .. و مع ذلك لسه في ناس بتقلل من الكرتون !!

كلارنس ... كلارنس ده من اعظم الاعمال الي ممكن طفل او شخص كبير يشوفها ...

في واحده من الحلقات مثلا كانوا بيناقشوا سباق الفضاء الي حصل في فترة الحرب البارده بين روسيا و امريكا و صعود امريكا للقمر فطلبت المعلمه من الاطفال انهم يصنعوا نماذج للصواريخ فواحد من الاطفال صنع نموذج للمونوليث من فيلم اوديسة الفضاء و الي ميعرفش الفيلم ده يبقي اعظم فيلم اتكلم عن الفضاء في التاريخ و المفروض ان المونوليث في الفيلم هو عباره عن لوح حجري اسود بالكامل كل ما البشر بيلمسوه كل ما بيخدوا خطوه زياده علي سلم التطور ...

في حلقه تانيه كانت مقتبسه من رواية 1984 لجورج اورويل و دي روايه لكاتب عبقري بتوصف انظمة الحكم الديكتاتوريه الشموليه و ازاي بتتحكم في عقول الشعوب و بتغير و بتزيف التاريخ في الحلقه سيطر مطعم الفرسان الجامحون علي مدرسة كلارنس و بدأوا يسيطروا علي عقول المدرسين و الطلاب و يغيروا تاريخ المدرسه لدرجة ان معدش حد فاكر انها كانت مدرسه بل هي دايما مطعم ... وازاي مالك المطعم بدأ يخلق نظام حكم شمولي و ديكتاتور داخل المدرسه ...

ده غير الحلقه الي اقتبسوا فيها من شكسبير و الحلقه الي ناقشوا فيها نظرية واقعية الاحلام...

وقت المغامره ؟ .... وقت المغامره عباره عن تحفه فنيه من الادب الفانتازي المظلم ... كل حلقه عباره عن قطعه من احجيه كبيره والمشاهده بيجمعها بدماغه طول ما هو بيتفرج علي الحلقات ..

و غير ده عروض كتير ... علشان كده انا دايما بتفرج علي كرتون و نصيحه مني خلوا اخواتكم و اولادكم يتفرجوا علي كرتون احسن من الهبوط الي بيشوفوه طول اليوم في الشارع و المجتمع و المدرسه و البيت و التليفيزيون ...

ادوهم فرصه يكونوا شخصياتهم من فضلكم ... خليهم يستمتعوا بعروض هتكون العامل الاساسي في تكوين وعيهم بدل ما يكبروا علي السطحيه و الانحدار ...