في واحدة من الحلقات التاريخية لكارتون جامبول تحت إسم " The Vision " ...
بيكتشف جامبول و داروين خطة سرية كتبها Allan البلونه للسيطرة علي المدرسة ونشر السعادة في العالم ...
الخطة دي لنقف و نتأملها في الواقع الحلقه كلها لازم نتأملها و نعبر عن مدي عظمتها ...
و ده لسبب مهم ... خطة آلان للسيطرة علي السلطة في المدرسة هي الخطة المتبعه في كل الدول النامية منها بلدنا العظيم ...
في البداية بتبدأ أول خطوة في خطة آلان بزرع فكرة إنه الأفضل كرئيس للمدرسة ...بل و كمان إقناع الناس إنها فكرتهم هما مش فكرته عن طريق إستخدام تفاعل متسلسل من رغبة عامة الشعب في سرقة أفكار بعضهم و إدعاء انها أفكارهم زي طريقة نشر الإشاعات كده ...
تاني خطوة كانت ببساطة زرع الأزمات الي هتؤدي بالتدريج للثورة و بالتالي هتؤدي للرغبه في التغيير و دي كانت نظرة آلان الواقعيه جدا
"الأزمات هي طريق التغيير" ..
فببساطة يحط ملصق كاذب إن الطلاب الي هيجيبوا درجات مرتفعه هتتفرض عليهم ضريبه انهم يشاركوا طعامهم مع الطلاب الاقل في الدرجات و بطبيعة الحال يرفض طلاب إيلمور الضريبة (رغم إنها مش حقيقية) و يقوموا بثورة و شغب ... فالسلطة الممثله بالناظر براون و المدرسين ميلاقوش مفر غير القيام بثورة مضادة و تبدأ الفوضي ...
و من هنا تبدأ الخطوة التالتة ...و هي إن آلان يرشح نفسه للرئاسة و يوعد بإنهاء الأزمات و كفل حرية التعبير و يقول جملته التاريخية
"إلمور أم الدنيا و هتبقي أد الدنيا" و يتبعها بجملة
"لو لم أنفذ وعودي يمكنكم الإطاحه بي "...
و بعد إستغلال حماس الجماهير تبدأ الخطوة الرابعه وهي تشويه المنافسين (إرهابيين -أشرار-فاسدين - تابعين لميس سيميانز) ...
و يكسب آلان الإنتخابات أخيرا ... و يسيطر علي السلطه لكن الخطة متنتهيش ... المعارضين في كل مكان ... ناس كئيبة و مكشرة ... فيقرر يعمل معسكرات السعادة و الي هيتم إرسال كل المعارضين الحزاني ليها علشان يبقوا " سعداء" ... في معتقلات خاصة هتعلمهم إزاي يتعرفوا عالسعادة تحت المراقبه ....
و من هنا ندرك إن آلان ببساطة شديدة حط علي كل شعوب العالم التالت في حلقه مكملتش ١٥ دقيقة ...
و يثبت جامبول تاني إنه الأعظم
بس مين يفهم ؟؟! ...