إيد إيدد و إيدي

فاكرين كرتون إيد إيدد و إيدي ؟ ... الكرتون الطويل الي كان بيتعرض علي كرتون نتورك و قبلها MBC3 ...

عموما هو واحد من أشهر مسلسلات الكرتون و أطولها و أكترها شعبية سواءا بين المشاهدين العرب أو الأجانب ...

الكرتون تقريبا إستمر لحوالي ست مواسم و فيلم طوله ٩٠ دقيقة و الي كان نهاية عرض عظيم و محبوب زي ده ...

بس ده مش موضوعنا ... موضوعنا إن الكرتون قبل ما نهايته بدأ ياخد منحني ظلامي و مخيف و مرعب ... و تعالي أفهمك ايه الي حصل ...

الكرتون عموما بيتكلم عن مجموعة أطفال إد إدد و إدي و الي عايشين في مكان بدون مراقبة أهل و بدون أي هموم بالتالي بيقضوا أيامهم في محاولة خداع أصدقائهم علشان ياخدوا الحلوي القاسية ...

المسلسل كان حلو جدا و دافي جدا و ممتع جدا و كرتون نتورك كانت قررت تزود جزئين بعد الرابع بس ألغتهم و عملت الفيلم بدالهم ...

مما يخلينا نقف قدام أخر حلقه في السيوزن الرابع ...
الحلقه إسمها Take this Ed and shove it

و في الحلقه ... يحاول إدي كالمعتاد بمساعدة صديقيه إنهم يخدعوا باقي الأطفال علشان الحلوي بس هيلاحظ إن الأطفال بلغوا خلاص و معدتش خدعه بتأثر عليهم ...

فيقرر إيدي إنه يخترع خدعه جديدة عن طريق إنه يقدملهم إستشارة بشأن حياتهم المستقبلية و الخدعه تنجح و تحصل مجموعتنا عالمال و تشتري الحلوي ...

لكن للأسف تتاخد منهم الحلوي و تتحط في خزنة و في محاولة يائسة لفتحها يقرر إيدي يضربها بدماغه فيفقد الوعي ...

يصحي إيدي بقي في غرفته و يتصدم بكونه عجوز كهل ... و من الصدمه يسيب غرفته بسرعة العجوز و يتصدم أكتر لما يلاقي كل الشخصيات إتحولت لعواجيز....

يحاول يكلم صديقه الذكي إيدد علشان يفهم الي حصل فيقوله إيدد إنهم أخر مرة كانوا أطفال كانت من ٩٠ سنه و إن كل المغامرات و الاحداث في الحلقات الي فاتت ما هي الا مجرد أحلام و ذكريات عجوز كهل مكتئب و حزين بيحاول يلجأ لذكريات طفولته ...

لكن إيدي ميصدقش و ينكر الواقع و يقرر إنه يفتح الخزنه الي فيها الحلوي بس مجرد ما يلمسها تتحول لتراب ...

و في صدمة النكران و الخوف يضرب إيدي راسه بعلبه وهو بيصرخ ...
"أنا مش عجوز !! ... أنا مش عجوز !!" ...

و فجأه يصحي إيدي و يلاقي نفسه طفل تاني و يفكر انه كان في حلم و يفتح الخزنه مع اصحابه الي رجعوا أطفال و قبل ما يحط الحلوي في بوقه يقولهم ...

"أنا مش عايز أكبر أبدا" ...

لكن مجرد ما يقفل فكه عليها ... يرجع عجوز ... تاني !! ..

و يبدأ يدرك إنه هو في حلم جوه حلم ... و يفهم الواقع في النهاية ... إنه عجوز ... علي المشارف الموت ...و الشباب و الطفولة مش هيرجعوا تاني أبدا ...

مفيش صيف تاني ... مفيش حلوي ... مفيش خدع او لعب ...

الحلقه في النهاية تنتهي علي إيدي العجوز وهو بيسخر من إيد الغبي وهو بيضحك ... و الكاميرا تقرب من وشه علشان في النهاية يقول جمله واحد ...

"لسه بتمني أرجع طفل"...

و تنتهي الحلقه علي كده ... و يكمل بعدها الكرتون الجزء الخامس بشكل طبيعي و حلقتين من السادس و فيلم أنهي المسلسل بشكل دافئ و لطيف ...

لكن مع ذلك الحلقه دي لسه بتؤرقني ...

هل الحلقه دي بتمثل الحقيقة ؟ ... ان كلهم عواجيز و باقي الحلقات ذكريات الماضي ؟ ...

الحلقه تعتبر تغيير جذري في محتوي المسلسل ... و حلقة صادمة ليا بشكل كبير ....

لإنها لو بتمثل الواقع ... فاحنا بقينا قدام واحد من أكتر الأعمال المأساوية الي شوفتها...