واحده من اكتر الحلقات ذات التأثير النفسي المرعب في كرتون وقت المغامرة هي حلقة
The Hall Of Egress
و الحلقة بتبدأ بكل بساطة بجايك وهو بيلوم فين علي كذبه علي أميرة النار لما خلاها تعمل حرب مع ملك الجليد و بالتالي يفقدها في الوقت الي كان هو و جايك فيه بيبحثوا عن كهف يستكشفوه ...
و الكهف ده لاقوه و الي دخله فين و جايك مش واخد باله علشان يدوس عيل فقخ يوقعه و بعدين يقف قدام تلت طرق و يختار واحد عشوائيا و يقع كمان مرة علشان يتفاجيء بنفسه في قاعه بيخترقها ضوء الشمس و في منتصفها تمثال لرجل ثلجي مقلوب و في أخرها بوابة مكتوب عليها
the hall of egress
و الي معناها
" قاعة الخروج "
يستنتج فين بكل بساطة إن ده مخرجه الوحيد من الكهف بس مهما حاول يحرك البوابة مش بتتحرك لغاية لما يهبط و يغمض عينيه و يريح عليها و يلاقي نفسه تجاوزها ..
بعد عدة محاولات يكتشف فين إن الطريقة الوحيده لتجاوز البوابة هي بإنه يغمض عينيه و بالفعل يتجاوزها لكن مهما حاول يحط منطق للممرات الي بيمشي فيها دايما بيقع في فخ و بمجرد ما يفتح عينيه يرجع للبداية تاني قدام البوابة المقفولة ...
من هنا يقرر فين التخلي عن كل محاولاته المنطقية لفهم المتاهة الي خلف البوابة و يجري بعشوائية و بدائية ... و فعلا تنجح محاولته و يخرج من الكهف لما يسمع صوت جيك و يتبعه لكن مجرد ما يخرج و يفتح عينيه يرجع للأول تاني في الكهف و قدام البوابة ...
هنا يقرر فين إنه يحافظ علي عيونه مغمضه لأطول فترة ممكنه لغاية لما يشوف أخرة الوضع إيه لكن للاسف مهما طالت حياته برا مع جيك وهو مغمض عينيه و مهما حاول و مهما بيمو و جيك يفتحوا عيونه كل مرة ... في كل مرة بيرجع قدام البوابة و كأن كل حياته الي مرت وهو مغمض كانت مجرد وهم ...
فيقرر فين قراره التاني وهو التخلي عن التفكير و المنطق و التخلي عن جايك و بيمو و السير بعشوائية في الغابة و يرجع للحياة البدائية بدون هدف او منطق أو أي نوع تفكير ... لغاية لما التيشيرت بتاعه الخيط الي كان إستخدمه منه للخروج من المتاهة يمسك في جذع خشب و يوقعه في النهر ... و هنا يتخلي فين عن كل ما يربطه ببشريته وهي الملابس و يرجع لأصوله الحيوانية ...
لغاية لما يوصل لبوابة الكهف تاني وهو مغمض عينيه ... و هنا عرف إنه نجح .. .أدرك إنه فهم المتاهة أخيرا و فتح عينيه علشان يشوف الممرات الخفية و الي خدها لغاية لما خرج و رجع لجيك ...
و أول ما جايك يشوفه فرحان يسأله عن الكهف لكن فين يرفض يتكلم و يقول كلمة واحده و هي
" لا تعليق "
جملة فين الأخيرة مش بتعبر غير عن شيء واحد وهو الصدمه الي حصلت لشخصيته بسبب تجربته مع المتاهة ... في الواقع المتاهة كانت بتمثل حياة و أخطاء فين و إنه علشان يتجاوزها لازم يتخلي عن كل شيء يعرفه عن نفسه ...
للإسف الحلقه مترشحتش لجايزة الإيمي لكن فريق كتابة الحلقه قال جملة مهمة جدا
" الحلقه تمثل قصة رعب نفسية عن فتي قرر التخلي عن كل ما يعرفه عن نفسه و عن كل ما يربطه بهويته من أجل التنقل لمرحلة أخري من حياته "
نضيف كمان إن الحلقة كانت بتمثل معاناة ثيسيوس في المتاهة ... المعاناة الي إتذكرت في الملحمة الإغريقية صراع ثيسيوس و المونيتور ... و إن ثيسيوس علشان يقدر يهرب من المتاهة بعد قتله للوحش قرر يستخدم خيط من ملابسه علشان يحدد بيه طريق الخروج ...