Creepy Story #4 قصة مريبة

"كنا بنقضي اجازة الصيف الخاصة بينا في كوخ العائلة وسط غابة شمالية عالحدود... الغابة كانت مشهورة بالغزلان و إحنا الصراحه كنا عائلة عاشقة لصيد الغزلان..

الغابة كانت عظيمة جدا.. جميلة جدا.. لوحة من لوحات الطبيعة الي تخليك كل الي تتمناه تفضل تتأملها طول حياتك بس..

وقتها انا كان عندي ١٣ سنة.. و يمكن مشكلة الغابة الوحيدة بالنسبالي وقتها كانت الحكايات الي بسمعها عنها..

حكايات سمعتها من السكان المحليين و الصيادين.. و الي غالبا والدي كان بيتجنب يحكيهالي عن قصد..و انا كنت متفهم ده من بشاعة القصص لما سمعتها..

حكايات بتتكلم عن عائلة سكنت الغابة قبل وجودنا بحوالي عشرين سنة.. العائلة كانت بتمتلك إبن صغير في نفس سني تقريبا.. و كانوا بشكل غريب بردو بيمارسوا صيد الغزلان..

القصص بتقول.. إن أثناء وجود العائلة في الغابة.. أبنهم كان بيشتكي دايما من رجل الظل.. كائن غريب علي شكل ظل بيطرق شباك غرفة الطفل كل ليلة..

و لما الطفل كان بيحاول يتغلب على خوفه و يسأل رجل الظل عن سبب طرقه الباب.. مكنش بيسمع منه غير كلمة واحده بس..

إقتلهم..إقتلهم..إقتلهم..

الطفل حاول يقول لأهله لكنهم طبعا قالوا إنها مجرد كوابيس.. ولما الطفل بدأت شكواه تزداد تزامنا مع زيارات رجل الظل الي مش بتقف.. عائلته إتهمته بالكذب و محاولة جذب الإنتباه و تخريب أجازتهم..

و في النهاية.. و بعد ما وصل الطفل الإنفجار و بعد ما الخوف سيطر على عقله قبل قلبه... إرتكب جريمته... و قتل كل أفراد عائلته...

القصة معروفة الصيادين لإنهم على حسب قولهم عثروا على جثث العائلة كلها بدون جثة الطفل... كانوا مذبوحين بفأس تقطيع الأخشاب..

ممكن ناس كتير مش هتصدق القصة... بس أنا كنت مصدقها.. و معنديش أي شك فيها.. لإن وقتها.. و على زجاج نافذة غرفتي.. كنت بشوفه واقف قدامها.. بيطرق بابها بأستمرار و مش بيقول غير كلمة واحده..

إقتلهم.. إقتلهم..

حاولت وقتها أتجاهله.. و إشتكيت لوالدى.. المشكلة.. إن والدي كل الي عمله إنه رد عليا بصوت متردد و مليان خوف و قالي..

"لو سمعت كلامه.. هتكمل الدايرة..و بعد سنين هتيجي هنا بإبنك... علشان تكمل دايرتك "..

و فجأة مسك بندقية الصيد... و إنتحر..

انا دخلت في حالة صدمة... العائلة كلها دخلت حالة صدمة من إنتحار والدي الغير متوقع.. إنتحر قدامي و انا طفل بلا حول ولا قوة..

خدت سنين علشان أتعالج من التجربة... و لكن رؤيتي للصورة دي.. خلتني افتكر إن رجل الظل لسه هناك.. في وسط الغابةمستني عائلة تانية يدخلها دايرته"..

ده كان تعليق مستخدم على الصورة الي قدامكم..

الصورة مجرد Art لكن من الواضح إنها تحمل داخلها آلام و رعب قديم بالنسبة لناس كتير..