طبعا لا يغيب عن حد فيكم... الخبر المنتشر بقاله يومين عن الفريق الكوري الي قدر يخلي أم تقابل بنتها الميتة (مجرد وهم) بتقنية الVR...
و طبعا مع الخبر أكيد شوفت الفيديو المحطم للقلب الي ظهرت فيه الأم وهو بتبكي مع محاولاتها اليائسة للمس بنتها بدون أي فائدة...
و في الوقت الي ناس كتير شايفه ده إنجاز عظيم للتطور التكنولوجي و بداية حقبة جديدة إلا إن كذلك في ناس كتير شايفين الي حصل ده غلط و مجرد بداية لحقبة تكنولوجية مظلمة على غرار الي شافوه في المسلسل المشهور بلاك ميرور...
طبعا أنا إنسان... و بالتالي أنا غير محايد و متبني وجهة نظر مسبقا وهي وجهة نظر الفريق التاني...
في الحقيقة أنا شايف الخبر بكل تفاصيله... و شايف الفيديو و كل الي فيه جريمة... جريمة لا تغتفر و يجب العقاب عليها...
يمكن كتير منكم مش شايفها جريمة بس صدقني... إستغلال مشاعر البشر و أحاسيسهم و ألامهم و أمالهم هي أبشع جريمة في حق الإنسانية...
متفهمنيش غلط... أنا مش ضد التقدم و التطور التكنولوجي بل بالعكس أنا أدعمه جدا طالما هيؤدي في النهاية لتطور البشر و تقدم حضارتهم...
و لكن النقطة الي حضرتك غافل عنها... إن التطور التكنولوجيا الي احنا ماشيين في سكته حاليا مش لتقدم الحضارة البشرية بأي شكل...
بل لتحويل البشرية و البشر للمادية التامة و تدمير اي جانب روحي أو نفسي أو أخلاقي... النهاية الحتمية هتبقى بتحول البشر لمجموعة من الآلات المسيرة بتقودها الرغبة الأستهلاكية في دوامة حياتية نمطية مش بتخلص غير بالموت..
طب إيه علاقة ده بالموضوع؟...
ده صميم الموضوع... لو مش واخد بالك التطور التكنولوجي و منه الي عمله الفريق الكوري عباره عن سباق رخيص بين الشركات و الأنظمة الرأسمالية...
الي عمله الفريق الكوري مجرد بداية لمستقبل مظلم... مستقبل هيتم المتاجرة فيه بمشاعرك و آلامك... مستقبل هيكون المنتج الأستهلاكي فيه رقم واحد هو المشاعر... مستقبل هيبقى أسوأ من تخيلات بلاك ميرور...
بعد عشر سنين هتلاقي شركة طلعت للنور بتقولك إدفع علشان تقابل حبيبك الميت... إدفع علشان تشوف أخوك المتوفي... إدفع علشان تكلم زوجتك في غيبوبة... إدفع علشان تسمع صوت والدتك الي قتلها المرض...
و هتدفع... بس الألم مش هيقل... بل على العكس هتلاقيه بيزيد... و هتبقى عايز كمان و تدفع أكتر..
و سرعان ما هتتحول مشاعرك و مشاعر البشر لمخدرات العصر الجديد...